Avdelingsleiar

Nav leverer arbeids-og velferdstenester til befolkninga i Norge og har om lag 22.000 medarbeidarar fordelt over heile landet. NAV skal gje menneske moglegheiter, og gjennom innsatsen vår skal fleire få høve til å vere i arbeid, delta i samfunnet og vere sikra inntekt.

Nav i Bergen har oppretta eit prosjekt med ei mellombels avdeling for handsaming av søknadar om arbeidsavklaringspengar (etter 11-5 i Folketrygdlova), journalføring av saker, klagesaksbehandling m.m. Avdelinga handsamar saker på vegne av dei fem NAV-kontora i Bergen og rapporterer til regionleiar. Avdelinga har om lag 14 tilsette og er lagt til regionkontoret Nav Bergen sentrum. Avdelingsleiar har både personal- og fagansvar for feltet arbeidsavklaringspengar. Den mellombelse stillinga som avdelingsleiar er ledig frå no og ut 2025.

I NAV i Bergen er vi mellom anna opptatt av tillitsbasert leiing, prosessleiing og kontinuerlig tjenesteutvikling til beste for våre brukarar. Vi ser etter deg som er ein tydeleg leiar, er god på å byggje relasjoner, er ein pådrivar i utviklingsarbeid, har gjennomføringsevne og ser verdien av samhandling og samskaping.